நாட்டில் நிலவும் சீரற்ற காலநிலை காரணமாக இதுவரையில் ஐவர் உயிரிழந்துள்ளதுடன், 573 குடும்பங்களைச் சேர்ந்த 2272 பேர் பாதிக்கப்பட்டுள்ளனர்.
நாட்டின் பல பகுதிகளிலும் கடந்த சில நாட்களாக கடும் மழை பெய்து வருகிறது. பல இடங்கள் வெள்ளம் காரணமாக நீரில் மூழ்கியுள்ளன.
இந்நிலையில் கடந்த 18ஆம் திகதி முதல் நாட்டில் நிலவும் சீரற்ற காலநிலையால் 7 மாவட்டங்களில் 573 குடும்பங்களைச் சேர்ந்த 2272 பேர் பாதிக்கப்பட்டுள்ளதோடு, ஐவர் உயிரிழந்துள்ளதாக அனர்த்த முகாமைத்துவ மத்திய நிலையம் தெரிவித்துள்ளது.
அத்தோடு கடும் காற்று மற்றும் வெள்ளம் என்பவற்றால், ஒரு குடியிருப்பு முழுமையாகவும் 38 வீடுகள் பகுதியளவிலும் கட்டடங்கள் மூன்று பகுதியளவிலும் சேதமடைந்துள்ளன.
மேலும் அனர்த்தங்களால் பாதிக்கப்பட்ட 61 குடும்பங்களைச் சேர்ந்த 203 பேர் தற்காலிக முகாம் களில் தங்க வைக்கப்பட்டுள்ளனர்.
இதேவேளை, அதிக மழை வீழ்ச்சி பதிவாகக் கூடும் என 8 மாவட்டங்களுக்கு சிவப்பு எச்சரிக்கை விடுக்கப்பட்டுள்ளது.
அதற்கமைய யாழ்ப்பாணம், கிளிநொச்சி, முல்லைத்தீவு, வவுனியா, மன்னார், திருகோணமலை, பொலன்னறுவை, மட்டக்களப்பு மற்றும் அம்பாறை ஆகிய மாவட்டங்களுக்கே 150 மில்லி மீற்றரைவிட அதிக மழை வீழ்ச்சி பதிவாகக்கூடும் எனத் தெரிவித்து சிவப்பு எச்சரிக்கை விடுக்கப்பட்டுள்ளது.
